Ślonskie fanzolynie

[bodzio_g]

woda sodowa i na dodatek z saturatora,

niewielu już wie jak wyglądały saturatory

saturator to była oaza na pustyni , wiela razy ona mi życie uratowała w szczenięcych latach po szkole albo jakiś..."mityngach".

Na "mineralka" i oranżada kapslowano kapslym wielokrotnego użytku tyż sie zelter godało. Piwo Kelt i cheba jakiesik holenderskie jeszcze sie tak kapsluje.

A kto pamiynto : "- Ober ! - 4 sety i 2 zeltry !"

ps- a kto pamiynto co to mityngi ?

[tomek1950]

woda sodowa i na dodatek z saturatora,

niewielu już wie jak wyglądały saturatory

 

Dzięki, w Warszawie zazywało się to "gruźliczanka"

Była z sokiem i bez.

 

"Poproszę wodę z sokiem.

Nie ma soku.

To poproszę bez soku.

Bez jakiego?"

[bodzio_g]

Dzisiej beła piykno pogoda ...

i zaroski mi sie wspomniało jak zech uwidzioł te ...dekolty

 

 

 

Jedna frela, chcąc mieć modno figura, tak wyrobiała ze sobą,

wychudła jak szcypa. Kiejś idzie drogom, a tu z jakiejś chałupy wyskaje

psisko i... na nia.

Jakiś karlus leci, podnosi kryka, żeby psa łodegnać, a kamrat do niego:

-Dej mu pokój!... Cego sie dziwisz? Biedny pies nigdy jeszce nie

widzioł tyla kości na roz.

[bodzio_g]

Śląsczyzna - obczyzna czyli uczta sie jynzyków

 

Give me a kiss to...

dej mi kusku

le petite pain

je żymła po francusku

te quiero mucho

to fest ci przaja

Cinco de Mayo

piontego maja

bella ragazza

to piykno frelka

a houzyntrega to znaczy

szelka

tak zech se dumoł

w Meksyku na plaży

i czekol aż sie cosik wydarzy

że przidzie do mje

beautifull frelka

i mje pociongnie za ślońsko szelka

a jo odpowiym tej muczaczicie

żech sie zakochoł

je taime nad życie

a ona powiy

besame mucho

abo inakszy

you dej mi kusku

a mozno kusku dej po francusku

wroz sie marzynia moji spełniły

czyjiś pazury we skora sie wbiły

trocha bolesno była ta pieszczota

na kusku zaroz mi przeszła ochota

już chca ta frela po hiszpańsku zganić

kiej sie okazało (niy ma co cyganic)

że to iguana co ze palmy ślazła

do mje pogodać po ślonsku przilazła

 

autor - Edulik

[tomek1950]

Bodziu, a 19 maja będziesz na spotkaniu u goroli?

[bodzio_g]

Bodziu, a 19 maja będziesz na spotkaniu u goroli?

paszport już stracioł ważność ale ...sproboja na książeczka wojskowo

[bodzio_g]

Zlot muratora 2007'

 

Jużech wytrzeźwioł , heksa dalij mie mynczy

ale w masażu Tole i Froszke nikt nie wyrynczy

na zlocie beło super gites , nic ująć nic dodać

przyjechołek tam na klachy wiync trza wszyckich łobgodać

 

Redakcjo zacno forum moderuje i spotkania organizuje i z tych zadań genau sie wywiązuje

Edzia żodnygo zlotu nie zawali , gdy godała to wszyscy sie jij słuchali

Maksiu kożdymu dobrze znany, do roboty ciągle był zaganiany

Tola nie chciała być misską to mi dziwno... , ale za to łostała sie ...siostrą piwną

Andrzej Wilhelmi - miglanc pierunowy wypił piwo ze mną ino do połowy

Tomek 1950 tyż sie nom wymigoł bo nie założył stroju ...służbowygo

Joolka Joolka czy Ty pamiyntosz..., nowo misska to jo se zapamiyntom

Froschka naszo gryfno frelka i farelka, dlo bodziów niezbyndno i pomoc wielka

Daggulka niby smoczyca łod Jastrzebia, serce dobre mo jak łod ...gołymbia

Jea czytoł od Jerzysia mowa , kożdy śmioł sie ... daja głowa

Andre - chłopak z gitarą, jakby nie Wiesia to ...niejedna chciałaby z nim byc "parą"

Jajcek synek morowy , galoty tyż mioł ...morowe

Maluszek pogodać z nią było miło, na kk tyż by sie pogaworzyło

Nefer ostry język twardo sztuka , takij na budowie nikt nie oszuko

Verunia wypytywanych punktowała , jak Maksiu nie widzioł to im ...dodawała

Anisia niby delikatno i drobno frelka , ale werwa i moc waliła od nij wielko

Tosinek w ogrodzie Toli zakochana, w naszym zogródku tyż mile widziana

Kropeczka - fajno dzieweczka, choć figurka mała, to wszyskich uśmiechym na łopatki obalała

Cpt Q najdłuższy marynarz wszystkich mórz, łowił laski na ...kapelusz

Jareko był bardzo zmieniony, no bo był ... cołkim łogolony

wiyncyj nie byda klachoł, bo nie przeżyje, jak oberwia od wos te wszystkie kije

piwo stygnie toż ...po szklanie ,no to ... wkiedy kolejne spotkanie ?

[Tedii]

Łobejżoł żech ze zlotu łobrozki i pieron mie strzellił zaroski.

Poznoł bych nowe frelki, a tak musiołech w sobota kłaść kafelki.

Ale jak ino sie do chałupy wprowadza,nie ważne czy sie moja staro zgadza,

Wsiedna zaroski w auto albo bana, i przyjada na zlot poklachać do rana.

[bodzio_g]

Tedii ale żeś doł czadu ...

wyklupej jeszcze cóś śwarnygo bo nieźle Ci idzie

[frosch]

nosz chop z tego teddi

 

jo nie poradza tak fajnie szrajbuwac jak wy

 

probowalach trocha na zlocie , ale mi nie wyszlo

 

http://images21.fotosik.pl/319/b7c148724d93092bmed.jpg

 

bodzio_g musza jeszcze trocha potrynowac

[bodzio_g]

Froschka - coś Ty mi robiła, że jo tak do parteru żech sie zbliżoł ...

[frosch]

Froschka - coś Ty mi robiła, że jo tak do parteru żech sie zbliżoł ...

 

jo????

jo chciala jakos fraszka na twoich plerach napisac

 

niy wiedzialach ze tak powalom chopow na kolana

[bodzio_g]

Moje plery nie poradziły utrzymać Twoich fraszek, musisz sam je tukej szrajbnońć, bo mie lyń tropi

 

Choroba

 

Jo ciyrpia na tako choroba

co zy mie zrobiyła nieroba,

mom przez nia same kłopoty,

bo mi sie nie chce roboty.

Nic nie robia, yno pisza,

śmiych do koła wszyndziy słysza,

toż prosza Wos, do cholery:

niech sie za mie weźnie kery

i niech chyci konsek bicza,

bo jo na to yno licza.

To najlepszo je metoda,

żebych skończył loć ta woda,

bo jo mom dwie zdrowe rynki,

yno kajś uciykły chynci.

 

autor - Fojerman

[bodzio_g]

Pielgrzymka do Piekor

 

Kożdygo roku w ostatnio niedziela maja wszyskie chopy i synki co ino mogom i chcom idom na pielgrzymka do Piekor Śląskich .

Jo tyż sie wybroł z poroma kolegami i ze szwagrym nale nie piechty ino autym. po drodze mijali my masa ludzi na kołach , moplikach i piechty. Pogoda była piykno to i ludzisków było wiela. Przyjechali my zawczas to my se jescze kawy napili i pajdla zjedli, a potym my już poszli na wzgórze kalwaryjskie . Po drodze spotkali my pora inszych kompli i znajomych wtorych my downo nie widzieli i pogodali my o starych dziejach.Trzy ćwierci na dziesionto ruszyły poczty sztandarowe , księżulki , biskupy i kardynały . Vipów tyż pora było , od nojwynkszygo przez tego średnigo aż do tego małygo abo i na odwrót.

Były powitania i ...pożegnanie . Pożegnali my naszygo chopa choć biskupa Libere, wtory objął nowo "fara" w diecezyji Płocki .Biskup Zimoń godoł o wartości rodziny , roli chopa , żony , matki...i kaj my to som... Kozanie godoł zaś biskup z Gorzowa, wtory piyknie przipomnioł nom kim my som i o tym ,że kożdy jest ważny dlo Boga. Jo tyż żech sie zastanowioł kim żech jest i dokond zmierzom i co zostawia po sobie , czego i wom wszystkim życza cobyście se podumali nad sobą. Na koniec porzykołek za wszystkich chopów i ...za frelki tyż, szczególnie za tych co ich znom i lubia.

Po błogosławiyństwie wrócili my do auta a potym do chałpy , kaj czekoł na mie smaczny łobiod : rolada, kluski i modro kapusta. To był piykny dziyń i bogaty duchowo, do zobaczynio zaś na Piekarskim wzgórzu.

bodzio

[bodzio_g]

Tychy

 

Kaj za staryj pierwy, postrzód lasów głymbokich

Szwarni myśliwce na gón chodzowali,

Osiedli w piytnôstym stuleciu siodłôki,

Chałpy po blisku se pobudowali.

 

Niywiela z tamtych czasów łostało:

Obrôz nóm szpecóm dziś blokowiska.

Ślónzôków tukej już miyszkô mało.

Po wojnie sjechali sie sam ludziska.

 

Tak zaplanowôł architekt rzóndowy:

Miasto-sypialka dlô robotników,

Co majóm jeździć stónd do roboty,

Do hut, zakładów, grubów, fabryków.

 

Ale jak z łoczów sie stracóm bloki,

Kiej se za miasta granice wykroczysz,

Hned Cie pozdrowióm na dródze Ślónzôki...

Tu Ślónska szukej, tu Ślónsk obôczysz!

 

Tukej połechcóm Cie ślónskie słowa:

Na Glince, w Czułowie, w Jaroszowicach,

W Bieruniu, na Wyrach, w Zôwiści, w Bojszowach,

Na Paprocenach, w Gostyniu, w Cielmicach...

 

Po ślónsku powitô Cie Radziejówka,

Piwym porôczóm Cie w Ścierniach, na Górkach.

A wele Lyndzin polejóm gorzôły,

Wusztu Ci dajóm w Podlesiu, Wesołyj.

 

A jeszcze rôd bych spómnioł na kóniec:

Te Wilkowyje, Żwaków, Mónkolec.

Tyn Wartogłowiec, Urbanowice,

Suble, Świerczyniec a Jónkowice.

 

A jak Ci jeszcze głowa niy spuchnie,

To drapko piechty ciś ku Kostuchnie.

Zalyź do Murcek, pojedź do Piôsku,

Grzibów nazbiyrej se w ciymnym Lôsku.

 

W Kobiyrze Korzyniec niy je głymboki,

Ku Starymu Stawie rychtuj swe kroki.

Napij sie wody tam przi zdrzódełku.

W Gostynce przejzdrzij sie jak w zdrzadełku.

 

A jak Ci jeszcze sam styknie czasu:

Na Starych Tychach łotrzep z marasu

Strzewiki a kup se na Rynku loda.

Tych pora czeskich niech niy bydzie Ci szkoda.

 

Masuja se blazy, bolôki, plynckiyrze,

Co mi wylazły na tym wanderze.

Choć wszyndzie mie boli, pôli a piecze,

To bardzo miyłuja tyn Ślónska kónseczek!

 

 

 

autor - G. Wieczorek

[frosch]

eeeej bodzio , widza zes sie opusciol leko w fanzolyniu

 

pomoga ci trocha

 

 

przilazi pedal do masorza:

-pani, dejcie mi taki fajny twardy wuszt

-chce pan w calosci czy pokroic w plasterki?

-jasne ze w calosci, co pani mysli ? ze jo mom zyc na zetony?

[bodzio_g]

Froschka - ino na Cie moga liczyć ...

 

Kuchnia ślonsko – bez lato (kuchnia śląska latem)

 

Momy lato, kwitnom i woniajom lipy, niydowno łokwitły akacje.

Kiedyś somsiod Sładek urzinoł nom asta ze lipy, i z tej asty łobierało sie kwiotki, kiere suszyło sie na tyj. Idzie tysz nazbiyrać dziurawca, abo feferminice i nasuszyć sie na zima. Mom feferminica na łogrodku to sie urwia pora prontkow i zaleja we zbonku wrawom wodom, i mom co pić na tyn wor (30 st. C). Taki tyj idzie pić gorki, zimny, słotki, abo bez cukru jak ta kto woli.

Chciołech zaczonć od jodła, a wyszło łod picio, bo tysz przi takich hycach bardzij chce sie pić niż jeść.

Z domu pamiyntom, jak mama nazbiyrała jagod we lesie, to potym warzyła kluski na parze i na łobiod mieli my kluski na parze z jagodami.

Nelka warzy kluski na parze dość czynsto i jymy je z cukrym i z masłym.

Szwagier Józek zaś jodoł kluski na parze polote żodkim pudingym.

Na łogrodku momy świyrzo gymiza, marekwia, blumkol, oberiba, koperek, szałot i to wszystko tysz sie szykuje do jodła. Ajntopf z gymizy to tysz dobre jodło, kiere styknie na cołki łobiod.

Zacznymy od zupy ze oberiby, gynsto zupa ze zasmoszkom do tego sznita chleba suchego, abo z masłym i już człowiek je pojedzony.

Nastympny łobiod gymizyzupa, młode kartofle ze koperkiym, abo sznitlokym, ku tymu ciaperkapusta (młodo kapusta je tako zowcito (wodnito) że trza do nij dać zasmoszka, abo posztamfowane kartofle do tego karminadle, abo warzone żeberka, pieczyń świńsko, abo łowiynzio, kotlety, abo co tam komu smakuje. Dzisioj u masarza idzie wybrać na co kto mo smak. Zamias ciaperkapusty dobro tysz je na te hyca mizeria, idzie przipiyc na maśle blumkol, idzie pokroć tomaty ze siekanom cebulom, abo ze zielonom cebulom (szczypior), abo ze sznytlokym.

Tera som modne surowki, idzie je zrobić ze młodej kapusty, kapusty pekińskiej, zielonego szałotu ańfachowego, abo lodowego, ozdobnego, abo jaki tam jeszcze wyrośnie, do tego trza potrzić marekwia, pokroć na małe konski radiski i dodać prziprawy. Mie tysz bardzo smakujom sznitbołny, polote masłym rostopionym.

Gymiza idzie tysz jeść na śniodanie, abo na wieczerzo. Tomaty idzie pokroć na chlyb z masłym, abo ze szpyrkom, posuć siekanom cebulom, abo sznytlokiym i już jymy. Ze tomatow mogymy tyż zrobić roztomańte sałatki, z tomatami możno tysz zrobić smarzonka, najprzod przipiekomy na tłuszczu pokrote tomaty, potym dodowomy do tego jajca i miyszomy asz smarzonka je gotowo, ło tym że trza jom posolić to kożdy przeca wiy.

Smarzonka idzie tysz zrobić z grzibami, liszki (kurki), abo maśloki, naprzod przipiekomy grziby, a potym dodowomy jajca i prziprawy.

Jakby babka miała swoje tomaty na zegrodce, dziadek musioł zrobić extra fribet, na flance tomatow, szałotu i tak dali, niy chciało mu sie, buczoł, buczoł, ale pozbiyroł deski, stare fligle z łokiyn i wyszykowoł piykny fribet.

A tomaty sioła jusz bez zima, do krzinki kiero stoła na fynsterbrecie, potym flancowała je do fribetu, abo na grzondka.

Jak godomy o surowkach to mi sie spomniało, ze kiedyś jadło sie surowo oberiba prosto z grzondki, stykło jom łostrugać scyzorykiym, abo łogryść zymbami, marekwia tak samo, stykło łopłokać, oszkyrtać nożykiym, ziorka zielonego groszku szło zjeść zaro na łogrodku zerwane prosto ze grzondki.

Bioły syr ze sznytlokym i radiskami, abo z cukrym tysz może być na śniodanie jak i na wieczerzo.

 

autor - Krzysztof Gilecki

[carringtontomas]

Za namową Bodzia_g wrzucam tutaj ogłoszenie o wysprzedaży moich gratów

 

Jesli ktoś będzie chętny proszę o kontakt

 

Skuli gibkiego wyjazdu do onkla w Reihu sprzedom drapko:

wertiko na wysoki glanc, szrank z trzyma dźwiyrzami, szeslong odwanckowany, dwa ligistule, sztyry gardinsztangi, gramofon na kurbla, jedyn kromlojchter na świczki, dwa zicherongi i sztyry byrny przyndzione, cyja, landszaft zagraniczny, blumsztynder z mertami, jedna donica ze sznitlochym, bifyj z szuflodami na nici, durszlag na nudle, pół funta hawerfloków, stryknadle, heknadle, zicherki, tolszery, kartofel – presa, cwitry, maszynka na gychaktes, biksa po magiwyrflach, topfkracer, flaszenpucer, szpangi do włosów, śranczek na szczewiki, fyrlok, ausgus, trzi kokotki, badywana, waszbret, kohlkastla, hok z mesingowym gryfym, bratruła, żdżadło, klajdsztynder z pelcmantlym i hutym, hozyntregle, spodnioki bez rostfleków, trzy pory fuzekli sztrykowanych i posztopowanych, sześć bindrów na gumie, kiecka z krałzkami, modny cwiter z golfym, ślubny anzug z kulami na mole, szczewiki z wysokim kromflekiem, abzace, dwa oberhymdy z ibrycznym kraglym, holcbajn, kryka, ryczka z nachtopem, gybis po fatrze, szkrobione taszyntuchy, bigelbred, złote załośniczki z gizlokami, brołtbiksa, kloper, ślinzuchy na kurbla, szuflodka na cwist i knefle, bigle heklowane, lojfry, tepich, krałzy, sześć kompotzislów, dwie szolki, trzi kible, waszpek, aszynbecher, śmiotek i szipa, sebuwacz, modro tinta, sztyry blaje, szlojder do bajtla, sztrajhejcle, pół funta preswusztu, kranc leberwusztu, trzi krupnioki, żymlok, modro kapusta, hefty, buchy i pukeltasia łod cery,

galoty po opie, fojercojg, blank nowe lacie, nec na dauerwela, portmanyj, taszka i brele po omie.

Wszistko to idzie łobejrzeć łod ćmy do ćmy u Grejty Harboł, Frynszita kole Kochłowic, ulica Kyncka numer łoziem. Przelyźć bez ajnfart kole hasioka do hinterhauzu. Fórtka na kecie.

Pozór! Gelynder złomany!

 

ktoś chętny do zakupu??

[Tedii]

Blank stare.

To tak jak ten wic o trzech śląskich świętach na G. ( z tego samego okresu)

[Tedii]

A`propos gelyndra, szukom tekstu piosenki "gelynder blues".

 

gelynder blues maj bjutiful

jak sie po nim zjada na dół

czuja sie jak król

niech sie inksze chopcy gapcą

a baby klachają durś .....

reszta żech zapomnioł.