Ślonskie fanzolynie

[bodzio_g]

Dzisiejszo biyda

 

Biydy sie naszyj wstydza,

Tato, idź do roboty,

Prziniyś trocha piniyndzy,

Kupisz sie nowe galoty.

 

Mamie kupisz tysz kiecka,

Bo mie tam nic nie trzeba,

Ale dlo modszych braci,

Leberwuszt bydzie do chleba.

 

Kaś twoje zdrowie straciył,

Tato juzaś cie dusi,

Rano pognom na hołda,

Czasym zjeść sie coś musi.

 

Syn tak z łojcym rozprawioł,

To nie sprzed wojny godka,

Pora miesiyncy tymu,

Z dialogym tym żech sie spotkoł.

 

Na Ślonsk sie biyda wcisko,

Biydniejom familoki,

Czasy już nie tak przychylne,

Niy takie jasne obłoki.

 

autor - Krzysztof-Gorol.

[joaz]

Weszłam na stronkę przez przypadek ale dzięki Wam wróciły wspomnienia ze Śląska, gdy będąc dzieckiem spędzałam wakacje u dziadków. Do dzisiaj śląska mowa kojarzy mi się z miłymi chwilami. Pozdrawiam ciepło

[bodzio_g]

Joaz - zaglondej tu gynsto...

[bodzio_g]

Walentynkowo moda

 

 

 

Prosza mje tu nie czarować,

na to jo żech je za staro,

nie znom sie na boznach chopie

licho byłaby s nas pora.

 

W ślypia zaglondać niy byda,

chocioż jak frelka sie czuja.

przestoń godać, że mi pszajesz,

no bo trocha sie gańbuja.

 

Możno zgodza sie na kino,

abo na szpacyr po ćmoku,

chociaż wiym, że takich jak jo

mogesz mieć pora na boku.

 

Tyś samotny, baby szukosz

jo tyż popszoć jeszcze umia,

a tyn pukiet skuli czego ?

Oświadczyny!!!! To rozumia.

 

Walentynki, Walentynki,

kożdy ło nich yno godo,

że do młodych je to moda

nom starym tyż sie podobo.

 

 

autor - Renia (ale nie naszo forumowo )

[bodzio_g]

Babski świynto

 

Je taki jedyn dziyń we roku,

jak mi sie kryncom płaczki w łoku,

mój ślubny przeca dzisiej pamiynto,

że jego baba mo wielki świynto

 

Kupi mi róża czy tulipana,

jo mu dom kusku postawia szampana,

kawa czy piwo se wypijymy

i tak we dwójka siedzieć bydymy

 

 

 

A łon nawijo jak nakryncony,

jaki to dobry dlo swoji żony,

że mje tak pszaje jo tymu rada,

ale tyż myśla jak kożdo baba

 

 

Że jakiś cel w tym chyba mieć musi,

bo niy po darmo tak godkom kusi,

że ni mo świynta chop niy żałuje,

przeca i Łon tak z babom świyntuje.

 

autor - Renia

[bodzio_g]

Inszo odmiana Pana Hilarego

 

"Hilary"

 

"Na Nojlandzie w familoku starym miyszkoł jedyn chop Hilary. Mioł łon pamiyńć pieronowo i jak ino ruszył gowom to dzieje spominoł stare: wkiedy piyrszy mioł zygarek, jak konie były na grubie - godoł - jak sie piyrze szkubie, kaj utopki w stawie żyjom, czymu łożyroki pijom, na co były biydaszyby, wkiedy rosnom wielki grziby, kaj król dycki piechty łaził, ale kaj se bryle wraził to Hilary zapomino, choć mioł je jeszcze przed chwilom. Bestoż z niyszczyńśliwom minom cołko chałpa przeszukuje i pierońsko pieronuje. Ale se niy myślcie wcale, że w tym poszukiwań szale delowka w chałpie pozrywoł. Tak to na Ślonsku niy bywo. Wiync co zrobił nasz Hilary? A dyć obyczajym starym jak to pobożno duszyczka pożykoł do Antoniczka. Tego patrona świyntego od wszystkiego straconego. Świynty drapko go wysłuchoł i tak pado mu na ucho: "Ahh... Hilary! Ty gorolu, dyć mosz bryle na kicholu!"

[bodzio_g]

Czekajonc na Wiosna

 

 

Prziszła po cichu, nikt niy zauważył,

niy chce rozgłosu, powitań, oklasków.

Dawołech pozór, czekołech na straży,

niy społech wcale, do samego brzasku

 

Przeszła kaś obok, ale cołkiym blisko,

coś mie musnyło, ciepłe luftu tchniynie,

kaś ptok zaśpiywoł, cosik w łoczach błyskło,

i nagle prziszedł spokój, ukojynie.

 

Choć punktualnie zjawiosz sie co roku,

zawsze ta sama, młodo i radosno,

czekom – stynskniony twojigo uroku

i byda czekoł. Bo ci pszaja WIOSNO!

 

śp. Giyniek 2004

[bodzio_g]

PRIMA APRILIS.

 

 

Myśla, że wszyjscy pamjyntajóm,

wróble ło tym na drzewach ćwiyrkajóm,

że szczególny dziyń dzisioj mómy,

uciecha mo kożdy – łod bajtla aż do omy.

 

PRIMA APRILIS łón sie nazywo,

w tym dniu możesz przeżyć na żywo,

że już z rana wtoś cie zrobi za bozna –

bo 1-go kwietnia „za cepa” robić można.

 

Jako, że tak to już je łod wjeku,

tóż weź sie to „ze szpasym” czowieku,

uśmiychnij sie i niy nerwuj sie zaro.....

by niy znikła nóm ta tradycja staro.

 

 

autor - Andy

[bodzio_g]

Wielkanoc 2009

 

Piykno wiosna , pogoda , trzy dni wolnygo ...

Handlyrze wielki utarg na świynta, bajtle uciecha ze śmiergustu, my trocha postu a potym wielko wyżerka , baby nowy friz i nowe ciuchy, chopy okazyjo do gorzołki...

Kożdy mo coś ze tych świont, ale...

Naukowcy na podstawie całunu Turyńskigo łobliczyli że :

- Pan Jezus mioł ponad 120 ran na cołkim cielie

- kolano zmasakrowane tak że ni mogł go zginać i wstawać samodzielnie po upadku

- wybity bark i nie poradzioł se z belką co wożyła ponad 30 kg

- złomany nos i ni mogł oddychać normalnie

- zalone krwią oczy i nie widzioł kaj idzie

- ze wszystkich organów jedynie serce było całe i zdrowe, bo inaczyj by nie dotrwoł do ukrzyżowanio

czy ktoś z nos pomyśloł wiela ON musioł wycierpieć ...za nas ?

czy ktoś poświęciłby sie tak samo jak ON ?

...

[3mejcie mie]

suchej, fajnie sie czyto te twoje ( wasze ) łozprowianie ale jak mom teraz to rozumieć?

[tomek1950]

suchej, fajnie sie czyto te twoje ( wasze ) łozprowianie ale jak mom teraz to rozumieć?

 

Jak wolisz

[3mejcie mie]

jo tam nie ma wiela pobożny ale nie wiym czy kożdy tak? a za te wesołe koncki bardzo wom dziękuja i byda dali wos czytoł bo mi sie to podobo a że som tak nie poradza to musza ino czytać.

[bodzio_g]

czytac to kożdy by chcioł , ale pisać to żodyn ... ( nawet wklejać żodyn...)

 

 

Wiosna przichodzi

 

Dziyń sie wydłużo, zima odchodzi,

Słońce zaglondo na nos z wysoka,

Kumin z ciepłowni coroz mnij smrodzi,

Koty już mrauczom wedle hasioka.

 

Wiosna niyśmiało przi fortce stoi,

Gryfno i modo do serc nom klupie,

Kwieciym wszelakim łonka sie stroi,

Wielkie porzondki w kożdyj chałupie.

 

Łokna jak żadła, zmyte dyliny,

Brzozowo mietła wartko tańcuje,

Jeszcze po praniu wyloć mydliny,

Zista sie piecze, kawa rychtuje.

 

Zima już zbrzidła, ciepła nom trzeba,

Wiosna na Ślonsku piyknie witomy,

Ździebko zielyni, konseczek nieba,

Na działce lauba już łotwiyromy.

 

A za dni pora przilecom szpoki,

Maras wypłocze dyszczyk majowy,

Nad naszom ziymiom tyncza, obłoki,

Wiosna przichodzi... pochylcie gowy!

 

 

autor - G O R O L

[bodzio_g]

Tomek 1950

 

Jak pisza te słowa to Tomek - komturski Warszawiok se śpi...

Ale jutro sie łobudzi i po krótki rekonwalenscencji pojedzie se do Komturii, siednie sie na ryczce i poczyto se spokojnie o naszym forumie, może i tukej tyż zajrzy ...

Fajny z niego gorol choć warszawiok, życzliwy, pomocny, kamrat niejednygo ślonzoka bo na grubie tyż robił.

Otóż tyn Tomek mioł ostatnio problem ... dostoł szlag czyli wylew.

Terozki se leży i dycho , i czeko na lepsze czasy, nale ...kożdy by tak kcioł se czekać na lepsze czasy.

Tomku - poleż se trocha w tym szpitalku, ale potym sie bier za robota , bo do Komturii zjadom sie całe masy ludzisków z Tobą pogodać i wypić jakigoś swojskigo winka abo "Specjala" abo i jako halbka.

Jo już na flaszka żech posłoł coby mi sie po drodze nie strzaskała abo ..."opróżniła" - na konto :

Gabriela Gab

02-433 Warszawa

ul. Przednia 5m6

mBank

65 1140 2004 0000 3402 2793 9103

 

jak ktoś chce to tyż może posłać na flaszka spirytu do ...smarowanio pleców

Tomku - mój bracik ( starszy od Ciebie ) tyż mioł wylew , tyż mioł cięcie bez cało głowa ale po ..."poru" dniach już był zdrów jak downij. Nawet mo to swoje plusy dodatnie takie jak ...przestoł kurzyć cygarety, wela na głowie mu sie lepij układo bo wzdłuż sznitki, ale som tyż plusy ujemne jak gorzołki pije ino z ...naparstka i ...seks może ino ze swoja żoną bo kożde wiynksze emocje mogom mu zaszkodzić

Toż pyrsk Tomku za Twoje zdrowie

[3mejcie mie]

ja wklić to umia!

 

Kopciuch

Downo tymu w jednyj chałpie miyszkała rodzina z trzyma cerami. Ale matka bardzij pszoła dwóm młodszym cerom, zaś nojstarszyj cerze niy przoła. Dowała ij nojgorsze roboty a potym sie jeszcze z nij śmioła, że je zmaraszono i ukopcono. Cera ta przezywali "Kopciuch". Było to fest niysprawiedliwe, bo dziołszka ta była rychtig robotno, a musiała ciyrpieć takie niyszynścia.

W tyj krainie rządzioł wtedy król, kery niy boł jeszcze żonaty. Bestoż zrobioł bal, na kerym mioł se wybrać jako piykno baba. Matka wyrychtowała na tyn bal yno dwie swoje cery, zaś Kopciuchowi w tyn dziyń dała fest dużo roboty i zakozała wyłazić z doma. Wtedy jednak dziołszce pomogła dobro wróżka, kero niy mogła już patrzeć na to wielge niyszczynście. Wróżka wyczarowała Kopciuchowi piykno kecka i złote szczewiczki, ale padała ij, że musi z balu prziść nazod jak zygor wybije dwanoście w nocy.

Jak przebleczony Kopciuch wloz na bal, to król zaro chcioł yno z nią tańcować i z nikim innym. Kiedy jednak zygor wybioł dwanoście, Kopciuch zaczął wychodzić z balu. Król go jednak niy chce puścić, więc dziołszka musi uciekać i na schodach straciyła jedyn złoty szczewiczek.

Nastympnego dnia król ogłosioł, że bydzie chodzioł po wszyskich chałpach i szukoł dziołchy, keryj pasuje zgubiony na balu złoty szczewiczek. Jak król wloz do rodziny z trzyma cerami, to matka pokozała mu yno te swoje dwie a Kopciucha wygnała do kuchnie. Król jednak usłyszoł, że tam ktoś je i kozoł ta trzecio cera przikludzić. Potym przimierzoł..... i padoł: Tyn szczewik je gynał na twoja szłapa! Chcesz być moją babą i królową?

A potym żyli dugo i szczynśliwie!

Zaś zło matka z dwiyma cerami jak usłyszały co król padoł do Kopciucha, to ze zdziwiynio i zazdrości zrobiyły tak gupie afy, czyli miny, że do dzisiej jeszcze z tymi pokrziwionymi gymbami łażą i porządnych ludzi straszą.

 

kajś żech to znod.

[bodzio_g]

Czopka, a galoty

 

 

Galoty, a czopka

prziszły roz ku sprzyczce,

tako wiódły godka

o chłopskij oblyczce.

 

Czopka sie wyśmiywo

z galot głosym srogim:

jo rozum okrywóm,

a wy yno nogi.

 

Na to ji galoty:

ważniejsze od złota

chróniymy klejnoty.

Ty, yno gupota.

 

autor - Fojerman

[vieslav33]

Zawsze cos mi mówiło, ze Flinstone to Ślązak. Teraz jestem pewien.

[bodzio_g]

Zawsze cos mi mówiło, ze Flinstone to Ślązak. Teraz jestem pewien.

no dyć to pewne ...

przeca Kopernik tyż była ślonzokiym

a Maryjka Skłodowsko z Kurie tyż...

[bodzio_g]

Łónaczyni

 

Downi, jak Starka i Starzik żyli,

óni do siebie sztyjc "łónaczyli".

Jo mały bajtel nic nie rozumioł,

bo jo łónaczyć jeszcze nie umioł.

Choć jo se na to fest pozór dowoł,

to jo zrozumioł co drugi słowo.

Teraz żech doros, umia łónaczyć,

i chca Wóm yno to wytłumaczyć:

nieważne, co by to miało znaczyć,

czasym se trzeba tyż połónaczyć

 

autor - Fojerman

[bodzio_g]

Żniwa

 

 

Słóneczko wschodzi rano na dworze,

zygor wybijo już sztwierć na szósto,

do pola idóm siyc gospodorze,

bo we rży zaczło już twardnyć kłósko.

 

Idóm kośnicy, jedyn za drugim,

kosy sie blyszczóm w lipcowym słóńcu,

z wszystkich strón cióngnie ogónek ludzi.

"Boże pómogej" je na poczóntku.

 

Za kośnikami wylazły baby,

obładowane w siatki a tasze,

niesóm do chłopów zbónek bónkawy,

a sznita chleba do ubiyraczek.

 

Dzieciarnia idzie im tyż pómogac,

bydzie te snopki do kozłów niósła,

a całe rżysko potym zgrabować,

coby mieć słóma tyż na powrósła.

 

Tak, do połednia, w słóncu, we chycu,

meter za metrym, kładóm pokosy,

pot z nich sie leje, gorko jak w piecu,

toż cióngnóm du dóm poklepać kosy.

 

A zaś pod wieczór cióngnie na pole

cały korowód ze wszystkich strón,

chodzóm tak dziynnie, z potym na czole,

aż pożniwujóm ze wszstkich pól.

 

Zwiezóm te snopki fóróm do stodół,

a do sómsieka ucisnóm fest,

coby bez zima nie ciyrpieć głodu,

a na przednówku było co jeś.

 

autor - Fojerman